آذربايجان تاريخي سندلري  

 گولوستان مقاوله سي     

قادير آللاه نامينه

ايمپئراتور اعلي حضرت لري، بوتون روسييانين ان شؤهرتلي و عظمتلي بؤيوک حؤکمداري و ايمپئراتورو و ايران دؤولتي نين صاحیبي، حؤکمداري اعلي حضرت لري پادشاهين اؤز تبه لرينه يوکسک حؤکمدار محبتينه گؤره، اونلارين اورکلرينه ضيد اولان موحاريبه نين فلاکتلرينه سون قويماغي و قديمدن بوتون روسييا ايمپئريياسي و ايران دؤولتي آراسيندا مؤوجود اولموش ثباتلي صلح و خئيرخواه قونشو دوستلوغونو مؤحکم اساس اوزرينده برپا ائتمه يي صميمي قلبدن، قارشيليقلي صورتده آرزولاياراق بو عدالتي و نيجات وئريجي ايش اوچون آشاغيداکي لاري اؤز صلاحيتلي موکل لري تعيين ائتمه يي فايدالي بيلميشلر: 

اعلي حضرت بوتون روسييا ايمپئراتورو - اؤز گئنئرال-لئيتئنانتي، گورجوستانداکي و قافقاز خطينده کي قوشونلارين باش کومانداني، هشترخان و قافقاز قوبئرنييالاريندا، گورجوستاندا مولکي حيصه، همچنین بو اؤلکه نين بوتون سرحد ايش لري اوزره باش مديري، خزر حربي دونانماسي نين کومانداني، مقدس آلئکساندر نئوسکي، بيرينجي مقدس آننا، دؤردونجو درجه لي مقدس عذابکئش و قابليت لي گئورگي اوردئنلري، هابئله اوزرينده ايگيدلييه گؤره يازيسي اولان قيزيل قيلينجلا تلطيف ائديلميش ذاتي-عالي لري نيکولاي رتيششئوي، اعلي حضرت ايران شاهي ايسه - اؤزونون، تورکيه و اينگيلتره سارايلاريندا فؤق العاده ائلچيسي اولموش، ايران ريسلري آراسيندا سئچيلميش، اؤز پادشاهيندان بريليانت لارلا بزه ديلميش خنجر و قيلينجدان، شال پالتاردان و بريليانت لارلا زينتلنديريلميش آت بزکلري دستيندن عيبارت فرقلنديريجي لطف گؤرموش، اؤز پادشاهي نين ان ياخين مأمورو، عالي ايران سارايي نين گيزلي ايشلر مشاوري، وزير نسلينه منسوب اولان، ايران ساراييندا ايکينجي درجه لي خان، يوکسک رتبه لي و چوخ حؤرمتلي ميرزه حسن خاني: بو سببدن ده بيز، يوخاريدا آدلاري چکيلميش صلاحيتلي موکل لر قاراباغ مولکونده، زئيوه چايي ياخينليغينداکي گولوستان کندينده توپلاشاراق، وکالتنامه لريميزي بير- بيريميزه تقديم ائتديکدن سونرا، هر بيريميزه اؤز طرفيندن بيزيم بؤيوک حؤکمدارلاريميز آديندان برقرار ائده جه ييميز صلح و دوستلوغا عاييد اولان هر بير شئيي نظردن کئچيريب، بيزه وئريلميش حاکميت و عالي صلاحيتلره گؤره آشاغيداکي مادده لري قرارا آلديق و ابديت اوچون تصديق ائتديک. 

بيرينجي مادده- ايندييه دک روسييا ايمپئريياسي و ايران دؤولتي آراسيندا مؤوجود اولموش دوشمن چيليک و ناراضي ليغا همين موقاويله ايله بو گوندن اعتيبارن و گله جکده سون قويولور و قوي ايمپئراتور اعلي حضرت لري بوتون روسييا حؤکمداري ايله اعلي حضرت ايران شاهي، اونلارين وليعهدلري، تاختلاري نين واريث لري و اونلارين، قارشيليقلي صورتده، عالي دؤولتلري آراسيندا ابدي صلح، دوستلوق و خئييرخواه راضيليق اولسون. 

ايکنجي مادده- بير حالدا کي، هر ايکي عالي دؤولت آراسيندا ايلکين علاقه لر واسيطه سيله (……………) يعني هر بير طرفين حاضيردا تام ماليک اولدوغو تورپاقلارا، خانليقلارا، مولکلره صاحیب قالماسي اساسيندا صولحون برقرار ائديلمه سي آرتيق قارشيليقلي صورتده راضيلاشديريلميشدير، اوندا اينديکي زاماندان اعتيبارن و گله جکده بوتون روسييا ايمپئرياسي و ايران دؤولتي آراسيندا سرحد آشاغيداکي خط اولسون: آدينابازار آدلانان يئردن باشلاياراق، دوز خطله موغان دوزو، آراز چايينداکي يئددي بولاق کئچيدينه دک، اورادان دا اوزو يوخاري کپنک چايي نين آرازلا قوووشدوغو يئره، سونرا دا کپنک چايي نين ساغ طرفي ايله مئهري داغلاري سيلسيله سينه و اورادان دا خطي قاراباغ و ناخجوان خانليقلاري نين مرزلري ايله داوام ائتديره رک، آلاگؤز داغلاري سيلسيله سي ايله قاراباغ، ناخجوان، ايروان خانليقلاري نين و يئليزاوئتپول دايره سي نين (کئچميش گنجه خانليغينين) بير حيصه سي نين مرزلري بيرلشن درله يَز مرزينه دک، بورادان ايروان خانليغيني يئليزاوئتپول دايره سيندن، همچنین قازاخ و شمشددين تورپاقلاريندان آييران مرزله ائششک مئيدان مرزينه، اورادان دا داغلار سيلسيله سي ايله، چايين ساغ طرفي ايله، اونون آخاري استقامتينده، همزه چيمن يولو ايله، پمبک داغلاري سيلسيله سي ايله شوراگؤل مرزي ايله، داغلار سيلسيله سي ايله، ماستاراس و آرتيکين آراسي ايله آرپاچايادک. بونونلا بئله، تاليش مولکو موحاريبه واختي الدن-اله کئچديينه گؤره، همين خانليغين زينزئلئي و اردبيل طرفدن اولان سرحدلري، داها آرتيق دوروستلوک اوچون، هر ايکي طرفدن قارشيليقلي راضيليقلا سئچيلميش کوميسارلار (اونلار باش کوماندانلاري نين رهبرلييي ايله ايندييه دک هر بير طرفين حقيقي حاکميتي آلتيندا اولموش تورپاقلارين، کندلرين، دره لرين، همچنين چايلارين، داغلارين، گؤللرين، طبيعي مرزلرين دقيق و تفصيلاتلي تصويريني وئره جکلر) طرفيندن، بو موقاويله باغلانيب تصديق اولوندوقدان سونرا معين ائديله جک، اوندا (………….) اساسيندا تاليش خانليغي نين سرحد خطي ائله معين لشديريله جک کي، هر بير طرف مالک اولدوغو تورپاقلارين صاحیبي قالسين. ائله جه ده، يوخاريدا خاطيرلانميش سرحدلرده، بو و يا باشقا طرفين خطيندن کنارا نه ايسه چيخارسا، هر ايکي عالي دؤولتين کوميسارلاري نين تحليليندن سونرا هر بير طرف (…………..) اساسيندا تامينات وئره جک. 

اوچونجو مادده - شاه اعلاحضرتلري اعلاحضرت بوتون روسييا ايمپئراتورونا صميمي دوستلوق حيسلري نين ثبوتو اوچون طنطنه لي صورتده هم اؤز آديندان، هم ده ايران تاختي نين عالي وليعهدلري آديندان قاراباغ و ايندي يئليزاوئتپول آدي آلتيندا ايالته چئوريلميش گنجه خانليقلاري، همچنین شکي، شيروان، دربند، قوبا، باکي و تاليش (بو خانليغين روسييا ايمپئرياسي نين حاکميتي آلتيندا اولان تورپاقلاري) خانليقلاري نين، بونونلا برابر داغستان، گورجوستان (شوراگؤله ايالتي ايله بيرليکده) ايمپئريا، قورييا، مينقرئلييا و آبخازييا، عئيني درجه ده، حاضيردا برقرار ائديلميش سرحد قافقاز خطي (بو سونونجويا و خزر دنيزينه عايد اولان تورپاقلار و خالقلارلا بيرليکده) آراسينداکي بوتون مولک و تورپاقلارين روسييا ايمپئريياسي نين مولکيتينه منسوب اولدوغونو قبول ائدير. 

دؤردونجو مادده- اعلاحضرت بوتون روسييا ايمپئراتورو اعلاحضرت ايران شاهينا اؤز قارشيليقلي دوستلوق حيسلريني ايفاده ائتمک و ايراندا - اونا قونشو اولان بو دؤولتده، مؤحکم اساس اوزرينده مطلقيت و حؤکمران حاکميت گؤرمک آرزوسونو صميم قلبدن تصديق ائتمک اوچون، بونونلا، اؤز آديندان و اؤز وليعهدلري آديندان ايران شاهي طرفيندن ايران دؤولتي نين واريثي تعيين ائديله جک وليعهده، لازيم گلديکده، کؤمک گؤسترمه يي وعد ائدير کي، هئچ بير خاريجي دوشمن ايران دؤولتي نين ايشينه قاريشا بيلمه سين و عالي روسييا سارايي نين کؤمه يي ايله ايران سارايي مؤحکملنسين. بونونلا بئله، اگر ايران دؤولتي ايشلري اوزره شاه اوغوللاري آراسيندا مناقشه لر باش وئررسه، روسييا ايمپئريياسي حاکيميتده اولان شاه خواهيش ائتمه يينجه بونلارا قاريشماياجاق. 

بئشينجي مادده- روس تيجارت گمي لرينه اولکي قايدا اوزره خزر ساحيل لري ياخينليغيندا اوزمک و اونلاري يان آلماق حقوقو وئريلير؛ هم ده گمي قضاسي زاماني ايرانليلار طرفيندن دوستلوق کؤمه يي ائديلمه ليدير. ايران تيجارت گمي لرينه ده همين بو حقوق - اولکي قايدا اوزره خزر دنيزينده اوزمک و روسييا ساحيل لرينه يان آلماق اختياري وئريلير، بورادا دا گمي قضاسي زاماني، قارشيليقلي صورتده، ايرانليلارا هر جور يارديم گؤستريمه ليدير. حربي گمي لره گلديکده ايسه، موحاريبه دن اول، هابئله صلح واختي و هميشه روسييا حربي بايراغي خزر دنيزينده تک مؤوجود اولموشدور. همين احترام داخيلينده، اولکي اختيار ايندي ده يالنيز روسييا دؤولتينه وئريلير کي، اوندان باشقا هئچ بير دؤولتين حربي بايراغي خزر دنيزينده اولا بيلمز. 

آلتينجي مادده - هر ايکي طرفدن دؤيوشده اسير آلينميشلاري، خريستيان دينينه و ... دينلره منسوب اله کئچيريلميش ساکين لري مقاوله باغلانيب امضالانديقدان سونرا، اوچ آي عرضينده، هر بير طرفدن قاراکيليسايا دک (بورادا سرحد رئيس لري اسيرلري قبول ائتمک اوچون اؤز آرالاريندا قارشيليقلي علاقه ياراديرلار) آذوقه و يول خرجلري ايله تامين ائديله رک، بوراخيلسينلار. اؤزباشينا، ياخود قانونو پوزاراق، قاچانلاردان هر بيرينه، ميلليتيندن آسيلي اولماياراق، اؤز کؤنوللو ايسته يينه گؤره اؤز وطنينه قاييتماق آزادليغي وئريلير، قاييتماق ايسته مه ين لر ايسه مجبور ائديلمه سين. بونونلا برابر هر ايکي طرفدن قاچميشلارا آمنيستييا، ياخود باغيشلانما وئريلير. 

يئددينجي مادده- بوتون يوخاريدا دئييلن لره علاوه  اولاراق اعلاحضرت بوتون روسييا ايمپئراتورو و اعلاحضرت ايران شاهي بويورورلار کي، لازيم اولدوقدا، اعلاحضرت لرين اقامتگاه لارينا گؤندريلن، اونلارين عالي سارايلاري نين قارشيليقلي ناظيرلر و يا ائلچي لري روتبه لرينه و اونلارا تاپشيريلميش ايش لرين موهوملويونه موافق قبول اولونسونلار؛ شهرلرده تيجارته حيمايه چيليک اوچون تعيين اولونموش موکل لرين و يا کونسوللارين اون نفردن آرتيق ميتي اولماسين، اونلار وکيل ائديلميش مأمورلار کيمي وظيفه لرينه لاييق حؤرمت و شرفه ماليک اولماليديرلار، همچنین، امرنامه يه اساسن، بوندان سونرا اونلاري نه اينکي اينجيتمک اولماز، حتتا اينجيکليک اولارسا، تقديم ائديلديکدن سونرا، هر ايکي طرفين تبعه لريني عدالتله محاکمه ائتمک، اينجيديلميشلري موربتله راضي سالماق گرکدير. 

سککيزينجي مادده- اعلاحضرتلرين، اؤز حکومتلريندن، ياخود حکومتلري طرفيندن تعيين ائديلميش سرحد رئيس لريندن آلينميش، اونلارين حقيقتن تاجيرلر، روسييا و يا ايران تبعه لري اولدوغونو تصديق ائدن يازيلي سندلره ماليک تبعه لري آراسينداکي تيجارت علاقه لرينه گلديکده، سازيش باغلايان هر ايکي عالي دؤولته قورو يوللا و دنيزله سربست گلمه يه، اورادا کيم نه قدر ايسته ييرسه ياشاماغا، تاجيرلر گؤندرمه يه، همچنین هئچ جور لنگيديلمه دن اورادان چيخيب گئتمه يه، روسييا ايمپئريياسينا منسوب اولان يئرلردن ايران دؤولتينه گتيريلن و قارشيليقلي اولاراق، ايراندان اورا آپاريلان ماللارين ساتيلماسينا و باشقا ماللارلا دييشديريلمه سينه ايجازه وئريله جک. هر ايکي عالي دؤولتين تاجيرلري آراسيندا باش وئره بيله جک مباحثه لره، اونلارين وظيفه لري و ... ايله علاقه دار شيکايت لرينه عادي قايدا اوزره باخيلماسي کونسولا، ياخود مووکيله، اونلار اولماديقدا ايسه يئرلي رئيسه حواله ائديلير. اونلار خواهيش لره تام عدالتله باخمالي، اؤزلري حاق تاميناتي وئرمه لي، ياخود بونو باشقا لازيمي شخصلرين واسيطه سيله طلب ائتمه لي و اونلارين اينجيديلمه سينه و سيخيشديريلماسينا قطعن يول وئرمه مه ليديرلر.  ايرانا گلميش، روسييا تبعه لييندن اولان تاجيرلر، ايسته سه لر، اورادان اؤز ماللاري ايله بيرليکده ايرانلا دوستلوق ائدن باشقا دؤولتلره ده سربست گئده جکلر؛ بوندان اؤترو ايران حؤکومتي بو تاجيرلرين سربست کئچمه سي اوچون اونلاري لازيمي پاسپورتلارلا تامين ائده جکدير؛ بونا تيجارت ايش لري ايله علاقه دار روسييادان روسييا ايله دوستلوق ائدن باشقا دؤولتلره گئتمک ايسته ين ايران تاجيرلري اوچون ده قارشيليقلي صورتده، رعایت ائديله جکدير.  ايرانا گلميش روسييا تبعه لريندن کيملرينسه اؤلوم حاديثه سي باش وئررسه، اونلارين مخللفاتلاري، همچنین باشقا داشلا و مولکلري، دوست دؤولتين تبعه لرينه مخصوص اولدوغو اوچون، ايلک نؤوبه ده، ساخلانيلمادان و خلوتي منيمسنيلمه دن، روسييا ايمپئريياسيندا و بوتون مدني دؤولتلرده ايجرا ائديلدييي کيمي، کيمين هانسي دؤولته، منسوبيتيندن آسيلي اولماياراق، قانوني اساسدان، قبضله، اونلارين يولداشلارينا ياخود قوهوملارينا وئريلمه لي، همين قوهوملارا اؤز آرزولاري ايله و اؤز خئييرلري اوچون بو املاک لاري ايسته ديکلري آداملارا ساتماغا ايجازه وئريلمه ليدير. 

دوققوزونجو مادده- روس تاجيرلريندن ايران شهرلرينه و يا ليمانلارينا گتيرديکلري ماللارا گؤره يوزه بئش فايزدن چوخ گؤمروک آلينماسين و همين تاجيرلر بو ماللار ايله هارا گئديرلرسه گئتسينلر، اونلاردان ايکينجي دفعه  گؤمروک طلب اولونماسين، اورادان آپارديقلاري ايران ماللارينا گؤره ده عئيني گؤمروک آلينسين، بوندان باشقا هئچ بير بهانه و اويدورما ايله هئچ بير روسوم، وئرگي، گؤمروک طلب ائديلمه سين. ايران تبعه لري نين روسييا شهرلرينه و ليمانلارينا گتيرديکلري و بورادان ايخراج ائتديکلري ماللارا گؤره و قارشيليقلي صورتده عئيني گؤمروکلر، عئيني اساسدا بير دفعه  آلينسين. 

اونونجو مادده- ماللاري مقاوله باغلاميش هر ايکي دؤولتين ساحيل لرينه و يا ليمانلارينا، ياخود دا قورو يوللا سرحد شهرلرينه گتيرديکدن سونرا، قارشيليقلي صورتده، تاجيرلره، نظارتي آلتيندا اولدوقلاري گؤمروک حاکيملريندن و يا التزامچي لاردان ايجازه آلمادان اؤز ماللاريني ساتماق، باشقا ماللاري ساتين، ياخود دييشمه يوللاري ايله آلماق آزادليغي وئريلير کي، تيجارت مانعه سيز دؤورييه ده اولسون همچنین ساتيجيدان و آليجيدان دؤولت خزينه سي اوچون منتظم اولاراق و کؤنوللولوک شرطي ايله قانوني روسوملار ييغيلسين. 

اون بيرينجي مادده- بو مقاوله ايمضالانديقدان سونرا هر ايکي عالي دؤولتين موکل لري، قارشيليقلي صورتده و تاخيره سالينمادان بوتون يئرلره اونون حاققيندا لازيمي خبر و هر يئرده حربي عملياتلارين درحال دايانديريلماسي باره سينده امرلر گؤندرسينلر. ايکي برابر حقوقلو نوسخه ده (فارس ديلينه ترجومه سي ايله بيرليکده) يازيلميش و سازيش باغلايان عالي طرفلرين يوخاريدا گؤستريلميش موکل لري طرفيندن ايمضالاناراق، اونلارين مؤهورلري ايله تصديق ائديلميش و قارشيليقلي صورتده دييشديريلميش بو ابدي صلح مقاوله سي اعلاحضرت بوتون روسييا ايمپئراتورو و اعلاحضرت ايران شاهي طرفيندن برقرار ائديله جک و اعلاحضرتلرين اؤز اللري ايله ايمضالانميش طنطنه لي راتيفيکاسييالارلا تصديق اولوناجاقدير. بو مقاوله نين همين تصديق اولونموش نوسخه لري بو عالي سارايلاردان، قارشيليقلي صورتده گؤندريلمکله اونلارين يوخاريدا آدلاري چکيلميش موکل لرينه اوچ آي مدتيندن سونرا چاتديريلاجاق. 

مقاوله مين سککيز يوز اون اوچونجو ايل اوکتيابر آيي نين اون ايکينجي گونو. ايران حسابلاماسي ايله مين ايکي يوز اييرمي سککيزينجي ايل شووال آيي نين اييرمي دوققوزونجو گونو قاراباغ مولکونده زئيوه چايي ياخينليغينداکي گولوستان کندينده روس اوردوگاهيندا باغلانميشدير. 

ايمضالاميشلار: 

موکل و گورجوستاندا باش کوماندان نيکولاي رتيششئو  (م : ي:) 

عالي شؤهرتلي ايران دؤولتيندن موکل ميرزه ابول حسن خان  (م : ي:)   

  http://sazeri.iblog.com/post/208326/304395